بكتب انهارده و أنا بكامل قواي العقلية - على ما اعتقد- و أنا ابن ال 21 سنة و على مشارف التخرج من الكلية (باقي شهر و نص و أناقش المشروع)، كلامي اللي جاي ده ممكن يزعل مني ناس كتيرة عزيزة عليا و يمكن يغير رأي ناس كتير فيا للأسوأ، فبنصح الأشخاص العاطفية اللي يعرفوني إنهم ميكملوش قراية بعد النقطة ده.
ج: علشان أتعلم
س2: ليه رحت الجامعة؟
ج: علشان أكمل تعليمي
س3: و اتعلمت؟
ج1: اه اتعلمت....
ج2: لا متعلمتش....
طبعا اللي قالك لا متعلمتش ده واحد إمعة و لقا الناس كلها دخلت مدارس و كليات رح دخل و خلاص و ضيع سنين شبابه فإنه المفروض يخشهم و خلاص و ده مش حضيع وقتي معاه لإنه في الآخر حيعمل اللي المفروض يعمله و خلاص.كلامي بقا مع اللي بيقول اه اتعلمت.... الشخص المكابر ..... المجادل ... السفيه!!! فاكر يعني انه حصل من العلم كتير و ان هو جهبز زمانه في تخصصه........ إقرا كلامي للآخر يا سيادة السفيه... بعد كل سنين التعليم اللي عشتها (و اللي عاشها غيري يعني مش حاجة مميزة اوي!) قعدت مع نفسي بكل موضوعية أقيم آخر 16 سنة من حياتي، لقيت انهم عدو بلااااا اي قيمة تذكر.... وبلاااا أي هدف .... ترس في مكنة لا مؤاخذه .... بتحرك في اتجاه ثابت ... معروف ... حد حطهولي، و انا ماشي به،لدرجة إن الواحد بيصدق ان ده طريقه ... أو ميصدقش مش مشكلة كده كده هيفضل كده علشان كل الناس كده و هو ده الصح .... هو ده المفروض!
اكتشفت ان العلم اللي حصلته من خلال قراءاتي المتواضعة في الكتب خلال السنين اللي فاتت كانت أضعاف العلم اللي حصلته طول سنين عمري من المدارس و الجامعة (و مازال قليل جدا) .... أنا بندم على العمر اللي ضيعته في اللاشيء ... في اني بحضر حصص و محاضرات مفروض احضرها .... كنت بنام في معظمها ... او كنت بهرج فيها او كنت حتى بسمع فيها .... و الله انا بكتب و انا مقهور على السنين اللي راحت من عمري انا عملت ايه؟ لمين؟ في حياتي ... ولا حاجة ... ولا حاجة فعلا ... ولا حاجة لنفسي ولا حاجة لاخواتي و لا حاجة لأهلي و لا حاجة للمجتمع اللي انا فيه ... و كمثال على العلم المتواضع اللي اتعلمناه: كانو بيقولولنا زمان إن المادة -أو الطاقة- لا تفنى و لا تستحدث من العدم (ده قانون بقاء الطاقة) ....... فاكرينه طبعا ... و المفروض ان هو بديهي جدا و مفهوم و منطقي و أولي و مجرد ..... اكتشفت بعد العمر ده كله ان ده كلام فارغ! ولا أساس له من الصحة! ايه البداهة اصلا في الموضوع ده ؟ ولا علشان بيتاخد في تانية ابتدائي و كل الناس خدته بقا بديهي؟ سفه!!!
أنا طالب علم كسول ... شبه خريج كلية علوم قسم جيولوجيا بترول ... لما تسأل عالم جيولوجيا ليه بيحصل زلزال ... يقولك علشان الصفائح التكتونية اتحركت ... ده مش إجابة .... لما تسأل طب ليه اتحركم .... يقولك علشان السوائل اللي عايمة عليها الصفايح اتحركت ده مش إجابة .... لما تسأل طب ليه بتتحرك السوائل؟ .... و يقولك علشان السائل بيتحرك بفرق الحرارة التقيل تحت و الخفيف فوق و اللي تحت يسخن و يخف و يطلع فوق ده مش إجابة .... كل اللي عمله انه رجع خطوة بالزمن لورا انت مجاوبتش على ليه الزلزال بيتعمل ولا ازاي ..... لما تبقى فاكر ان البني قادم بيشوف بالعين تبقى سفيه ... ولا المخ و لا العصب البصري و لا الضوء .... كل ده كلام للعوام السفهه ... اللي يعلم صح يعرف حقيقة الأشياء....
الغريبة ان بعد كل السنين ده رجعت للاجابة اللي كنت بكتبها في سنة أولى ابتدائي و المدرسة تقول عليا في ما معناه اني سفيه و سطحي ....ليه السما بتمطر؟ و ليه اليوم نصه ليل و نصه نهار؟ .... علشان ربنا عايز كده (أراد أو شاء)!!! ... هو ده مدخل العلم الحقيقي ... اعتبرها دعوة للقراءة ... دعوة للفلسفة ... دعوة للتصوف ... دعوة للتفكر ....... دعوة لعدم السفه.و سبحان مسبب الأسباب.
مروان عوض
تمام كلامك منطقى وجميل
ReplyDeleteانا مختلفة معاك ف كلام بس مش عارفة اقوله ازاى
انا شايفة ان اى سنة بتعدى بستفيد فيها حتى لو معلومة صغيرة
تقدر تقلى السنين اللى انتا شايفها ضاعت ع الفاضى لو كانت موجودة دلؤقتى كنت هتعمل ايه ؟؟
اكيد كانت هتضيع
ما هو متقنعنيش انك لو مكنتش اتعلمت اللى اتعلمته وكان وقتك فاضى كنت هتزاكر برضه وتبقى حياتك كلها مزاكرة
اه السنين ضاعت ومستفدتش حاجة بس كان بيجى وقت تزنق نفسك وتزاكر وكل كلمة سعتها كنت بتزاكرها ربنا كان راضى عنك
تقدر تنكر شعورك لحظة ما عرفت درجتك ف اى مادة وف اى سنة
بتتضايق اذا جبت درجة وحشة وبتفرح وتتنطط اذا جبت درجة جميلة تفخر بيها
طب ما دام ما انتا شايف ان السنين دى مش مهمة كنت ليه بتحس بفرح او حزن ساعة ما تعرف ثمرة مجهودك
احنا اتخلقنا علشان نزاكر وننجح ولما نفشل نزاكر تانى لحد ما ننجح
كل واحد فينا ضاع من عمره 12 سنة ف ابتدائى وتلاتة
ف اعدادى وتلاتة ف ثانوى كلنا حصل وهيحصل معاناكده ابتدائى بتأسسك ع كل حاجة واعدادى بتبقى مرحلة منطلقة ومتفتحة بتعرف فيها حجات جديدة اما ثانوى
فتبقى اختبار
محدش بيتولد دكتور او مهندس كل واحد بيتولد طفل وبيكبر لحد ما يوصل للمرحلة اللى يختبر فيها نفسه ويحدد مستقبله هيبقى دكتور ولا هيبقى مهندس ووو
متفقة معاك طبعا ان اى حاجة بتحصل لان ربنا عايز كده
اصل ممكن ابقى دكتورة شاطرة اووى وهعمل عملية تافهة وبسيطة لكن ربنا رايد ان اللى هيتعملوا العملية يموت بسببهاومفيش حاجة بتقف ادام ارادة ربنا ويموت
انا اه قلت لماما قبل كده ليه السنين دى كلها علشان ادخل كلية لكن مقدرش مثلا ولما اوصل 7 سنين ادخل كلية واقول انا هفهم
طب ازاى
كل سنة عدت من عمرى حاسة انى استفدت بيها
كفاية انى عارفة انى لما بروح المدرسة وبطلب العلم اذا ربنا اراد انى اموت فابقى مت ف سبيل الله وهو فى احلا من كده
انتا محتاج تقعد مع نفسك وتحدد هل فعلا انتا شايف السنين اللى عدت ضاعت ع الفاضى لو شايف كده يبقى خلاص مفيش فايدة تضيع سنين تانى من عمرك ف كلية لانك بعد سنين هتيجى تقول وانا استفدت ايه من الكلية وهنبقى رجعنا لنفس النقطة
لكن اذا شايف انك استفدت من اى سنة وان عمرك مضعش كده يبقى انوى انك تبقى حاجة كبيرة وتبقى قدوة لغيرك
وادعى ربنا
انا مجرد انى نويت ابقى دكتورة وبدعى ربنا واشوف دكتور ناجح زى احمد زويل او الدكتور مجدى يعقوب بيحسمنى اكتر ويخلينى اتمسك بحلمى انى ابقى ف يوم من الايام زيهم
أشكرك على اهتمامك و ردك و هو في الاول في الآخر مسألة آراء
Deleteواضح انك عاطفية اوي في كلامك ... ... ربنا مخلقش آدم وحواء و مبنيين معاهم واحد اسمه مدرسة و التاني اسمه جامعة ... لو فكرة ان كل العظماء في التاريخ دخلو مدارس و جامعات علشان يبقو عظماء راجعي التاريخ ... و كلامك على الاحساس بالرضى و السعادة ده مش مقياس ... السعادة ده نسبية منا ممكن اعمل شر و ضميري ميأنبنيش و احس ان عملت حاجة كويسة او العكس ...
ولكن الشيء الملموس أدامي اني خلصت مدرسةو جامعة بلا أي إنجازات انجزتها .... و كل اللي بنضحك على نفسنا من تفوق و نجاح علشان نرضي نفسنا ده مش انجازات عالاقل في وجهة نظر غيري ....يعني نجاحي ده لنفسي مش لغيري
لو مكنش دخلت مدارس و جامعات مكنتش حعض طول حياتي بزاكر !
بس كنت حكون اشتغلت بدري أكتر ... اتجوزت بدري أكتر ... اتعلمت بحرية أكتر .... لفيت الدنيا اكتر ...
و هي مسألة آراء في الآخر :D